En Patués

Compartir
Vota:
foto13%5B1%5D%20%20pq

Ista ye una historia chica de las cosas més o menos importantes que van pasa a Sesué al Siglo XX, contadas per quí las van viure.

Encomensan el siglo a Sesué lleva tres casas que feban sierro (que yera la tela que feban del CAME), ta 1930, yeran Casa Chinés, Casa Antonio y Casa Muel, güe totas sin chen.

El carpintero yera Vitorina, el albañil Manolo; el farrero Caseta, que va vinre de Castilló, de Casa Morancho.

Sesué teniva molino, que va funsiona hasta 1963, an que una riada se l´en va llevá. Marchaba dan el aigua que se repllegada a una sequia, que la preneba del rio un poco mes t´alto de la Bordeta Antón. El molino yera de Casa Molino hasta 1930, an que se va venre a unas cuantas casas de Sesué per 20.000 pts. Veniban a molre de Sesué y dels llugás del Solano y per fegüe se les cobraba en farina u en perras. El molinero arrendaba el molino a la sociedat; algunas vegadas feban de molineros chen de las mismas casas de Sesué (Pey, Manolet,...) pero tamé en va vinre de fora, quedanse a viure a Sesué.

Vá está una revolusión tal llugá cuan se vá posá en marcha la cantera del Castellaso. Un día de per 1960 van aparesé per Sesué dos catalans, el Sr. Latorre y el Sr. Moles, dan la intensión de fé una cantera de Mármol a la roca del Castellaso. Van preguntá de quí yera y vá resultá que no yera de digú, coma el monte de Sesué yé mol chico, no daba tá habelo registrau coma Monte de Utilidad Publica.

Coma bedeban el interes de Latorre y Moles per explotalo, van desidí de escrituralo a nom de las casas que yeba abiertas a la vegada al llugá, acto que se va fe a Villanova al bar de Pey, a la vegada que el notario feba el contrato de arriendo del Castellaso dan els catalans. A cantera va coincidí en el temps dan otro evento de importancia; las obras de las centrals que va fé la OCISA. Van fé el puen de entrada a Sesué; Puen de la Ocisa y tamé la pista que puya a la cantera.

La Chen del llugá les va paresé que llera el momento de fé la pista que puya a Griscuén, que son uns praus de Sesué que yei ensima de San Sadurní y dan els de Erisué van contrata a “Fraile” que yera un palista de Ejea de los Caballeros, ta fé la pista de Griscuén y fela arribá hasta Erisué. Dan la obra de la pista van pasá moltas cosas. Pensaban pagale en els dines del arriendo de la cantera, pero va resultá que Latorre y Moles no les pagaban, aixi que van tinre que denúncialos, al final el pleito se va ganá y se va podé paga a Fraile y torná las perras a las casas que las evan avansau tá continua dan el pleito.

El temps de la OCISA, per 1960, vá está un temps de moltos acontecimientos, las obras, els puens, els camins, el canal.....

Moltas casas de Sesué preneban familias a viure ta mientras las obras, veniban chen de tota España, sobre tot andaluces.

Antes de fé el Puen de la OCISA, Sesué se comunicaba en Vilanova per una palanca que ñeba al suelo del camino de Baix y que cada riada caleba refela, per qu´el rio sel en eva llevau. La entrada principal ta Sesue yera pel camino las Espllanas, que va está la primera entrada rodada tal llugá, y se va fé a vecinal.

Dan las obras del canal va habé de tot, tamé muertos, po lo menos en va habé cinq, alguns d´ells dispues de habels enterrau , els van tinre que desenterrá, per que su familia els eva veniu a repllegá ta llevaseneslo a sus llugas de origen. Tamé sen va morí uno que yera de Castilló, a iste mismo accidente se va fé molto mal als güells el Sr. Latorre.

Dan la central tamé va arriba el “Canon”, impuesto dan el que se va pagá el cemento ta la entrada a Sesué pel Puen de la OCISA.

El aigua a las casas va arribá ta 1960, feta pel siño Leonardo de Castillo y la achuda de vesinals. La Escuela, estaba aon ara ye el Ayuntamiento, que va esta abierta hasta 1975, su saguera maestra va está la Señorita Laudita. Els de Pey favan de taxi dan “La Genoveva” que yera un coche viejo que va funciona durante un temps; después van arriba els camions. Y hara mismo a Sesué yei Pintó (Casa Antón),carpintero (Casa Caseta), electricista (Casa Gaspar), tamé está “El Remos” ta doná trevall y atensión als que les falta un poquet, y camping y restauran que u fan els de casa Arnaldet de Erisué y se me ixupllidaba un bar del Ayuntamiento.

Els ganadés que antes teniban las vacas a corralons a dintro del llugá, se van fé naves a las aforas. Y no fa guaire van encomensá a fé casas tals turistas y de ista manera ye coma a anau cambian nuestro llugá, hasta güe.

Istes, son mes u menos las cosas mes importantes que van pasá a Sesué de la segunda mitad del siglo XX y que ven seguro que mos habrem ixupllidau alguna; si mos la contats lo colarem a iste puesto dan la intención de fe milló la historia de Sesué.


Ayuntamiento de Sesué - Huesca
telf. 974 55 35 54  ayuntamiento@sesue.com

 


Siguenos en: Agreganos a tus RSS
  • Diputación de Huesca

Ayuntamiento de Sesué - Huesca
telf. 974 55 35 54  ayuntamiento@sesue.com